कोरोना भाइरस नेपाल: सङ्क्रमण १० हजार नजिक, दुई हजारभन्दा बढी निको - सिधा मिडिया





कोरोना भाइरस नेपाल: सङ्क्रमण १० हजार नजिक, दुई हजारभन्दा बढी निको

    ८ असार २०७७, सोमबार १६:३८  मा प्रकाशित
725 जनाले पढ़िसके








नेपालमा विगत २४ घण्टामा थप ५३५ जनामा कोरोनाभाइरस सङ्क्रमण पुष्टि भएको स्वास्थ्य तथा जनसङ्ख्या मन्त्रालयले बताएको छ।

योसँगै सोमवार अपराह्णसम्म देशभरि पुष्टि भएका सङ्क्रमितको कुल सङ्ख्या ९,५६१ पुगेको छ।

तीमध्ये २,१४२ जना निको भएका छन् भने २३ जनाको मृत्यु भएको छ।

विगत २४ घण्टामा ३७० जना कोरोनाभाइरसमुक्त भएर अस्पतालबाट घर फर्किएको मन्त्रालयका प्रवक्ता डा. जागेश्वर गौतमले बताए।

असार ४ गते सर्वाधिक ६७१ जनामा कोरोनाभाइरस फेला परेको बताएको थियो।

अहिलेसम्म प्रदेश नं २ र ५ मा सर्वाधिक सङ्ख्यामा कोभिड-१९ भएका व्यक्ति भेटिएका छन्।

कहाँ सबैभन्दा बढी सङ्क्रमण?
सोमवारसम्मको तथ्याङ्कमा प्रदेश नं २ मा ३,१५९ सङ्क्रमण र प्रदेश नं ५ मा २,६८२ जना सङ्क्रमण पुष्टि भएको छ।

सबैभन्दा कम वागमती प्रदेशमा ३०९ र गण्डकी प्रदेशमा ५९५ सङ्क्रमण भेटिएको छ।

त्यस्ते प्रदेश नं १ मा ४७०, सुदूरपश्मिमा १,०६७ र कर्णालीमा १,२७९ सङ्क्रमण पुष्टि भएको छ।

सबैभन्दा बढी सङ्क्रमण भएको जिल्ला रौतहट रहेको छ जहाँ १,१४६ सङ्क्रमित रहेका छन् भने दैलेखमा ७२६, कपिलवस्तुमा ७०५, सर्लाहीमा ६१४, महोत्तरीमा ५२७, बाँकेमा ३४४ र सुर्खेतमा ३०० सङ्क्रमित रहेका छन्।

नेपालमा कोरोनाभाइरस
विगत १० दिनमा यसरी पुष्टि भयो सङ्क्रमण

स्रोत: स्वास्थ्य तथा जनसङ्ख्या मन्त्रालय

के छ अरू तथ्याङ्क?
मन्त्रालयका अनुसार विगत २४ घण्टामा ६,१९८ वटा नमुनाको पीसीआर विधिबाट परीक्षण गरिएको थियो।

यससँगै कोरोनाभाइरस सङ्क्रमण पुष्टि गर्न प्रयोग हुने उक्त परीक्षणको सङ्ख्या १,८१,२७१ पुगेको छ।

अहिलेसम्म रसुवाबाहेक सबै ७६ वटा जिल्लामा कोभिड-१९ पुगिसकेको पुष्टि भएको छ।

क्वारन्टीनमा भएका मानिसको परीक्षणमा तीव्रता दिइएकाले सङ्क्रमितको सङ्ख्या बढेको सरकारी अधिकारीहरूको भनाइ छ।

अहिले देशभरि ९०,७३० जना क्वारन्टीनमा छन्। तीमध्ये अधिकांश भारतबाट फर्किएका हुन्।

सरकारको तथ्याङ्कअनुसार सुदूरपश्चिम प्रदेश, प्रदेश नं ५, कर्णाली प्रदेशमा र प्रदेश नं २ मा सर्वाधिक सङ्ख्यामा मानिसहरू क्वारन्टीनमा छन्।

© 2021, Sidha Media. सर्वाधिकार सुरक्षित नोट : यस सिधा मिडियाबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘सिधा मिडिया डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

यो खबर पढेर तपाईलाई कस्तो महसुस भयो ?

प्रतिक्रिया दिनुहोस