‘कोरोना लाग्दा पनि नियमित गुर्जाे खाएँ, निको भएपछि पनि छाडेको छैन’

    ६ आश्विन २०७७, मंगलवार २०:२८  मा प्रकाशित
1361 जनाले पढ़िसके








कोभिड–१९ को सङ्क्रमण बढेसँगै तनहुँमा गुर्जो सेवनप्रति सर्वसाधारणको आकर्षण बढेको छ। रोगसँग लड्ने प्रतिरोधात्मक क्षमता बढाउन भन्दै गुर्जाे सेवन गर्ने क्रम बढेको हो।

कोरोनाको जोखिम बढेपछि गुर्जोको रस नियमित सेवन गर्न थालेको शुक्लागण्डकी नगरपालिका–४ दुलेगौडाका एकनारायण भण्डारीले बताए। कोरोना जोखिम नदेखिदाँसम्म गुर्जाेको वास्ता नभए पनि अहिले परिवारले नै यो नियमित सेवन गर्ने गरेको उनले जानकारी दिए।



‘रोग प्रतिरोधात्मक क्षमता बढाउँछ भन्ने सुनेपछि परिवारले नै गुर्जा सेवन गर्न थालेको छौं,’ उनले भने।

गाउँमा घर वरपर र जङ्गलमा प्रशस्तै पाईने गुर्जो अहिले सहरका बगैंचा र करेसामा समेत लगाउन थालिएको छ। नियमित सेवन गर्न थालेसँगै छिमेकीको खाली जग्गामा पनि गुर्जो लगाएको भण्डारीले जानकारी दिए।

कोरोना सङ्क्रमणबाट मुक्त भएका देवघाट क्षेत्र विकास समितिका अध्यक्ष शिवराज पौडेलले होम आइसोलेसनमा बस्दा नियमित गुर्जोको रस पिएको जानकारी दिए।

‘सङ्क्रमण पुष्टि भएर होम आइसोलेसन बस्दा नियमित रूपमा गुर्जोको रस, बेसार पानी, कागती पानीको सेवन र शारीरीक व्यायाम गरें,’ उनले भने, ‘अहिले निको भएपछि पनि गुर्जो नियमित सेवन गर्ने गरेको छु।’

कोरोनाको सङ्क्रमणपछि गुर्जोप्रति आकर्षण बढेको जिल्ला आययुर्वेद स्वास्थ्य केन्द्रले जनाएको छ। केन्द्रका प्रमुख डा। रामप्रवोध मण्डलले गुर्जोमा एन्टिबायोटिक र एन्टिब्याक्टेरियल गुण प्रशस्त पाइने जानकारी दिए।

‘कोरोनालाई मार्ने एन्टिभाइरल मेडिसिन अहिलेसम्म बनेको छैन, यसलाई जित्ने भनेको इम्युनिटी पावर बढाएरै हो। ३५ सय बढी अनुसन्धानबाट गुर्जोले इम्युनिटी पावर बढाउने पुष्टि भएको छ,’ उनले भने, ‘गुर्जोको सेवनले कोरोना भाइरस मात्रै होइन, अरू भाइरसबाट पनि बचाउँछ।’

उनका अनुसार ताजा गुर्जोलाई एक औंला बराबर काटेर त्यसको ५ मिलिटिर रस निकालेर बिहान बेलुका पिउनु उत्तम हुन्छ। रस बढी तीतो भएर पिउन नसकेमा त्यसलाई टुक्राटुक्रा पारेर रातभर पानीमा भिजाउने र भोलिपल्ट पानीमा उमालेर सेवन गर्दा पनि हुने उनले बताए।

उनका अनुसार गुर्जोको सेवनले नकारात्मक असर गर्दैन। गुर्जो कोरोना सङ्क्रमितले मात्रै नभएर अन्य रोगका बिरामीले पनि सेवन गर्न सक्ने उनले जानकारी दिए।

‘कोरोना निको पार्ने औषधि बनेको छैन, कोरोना निको पार्ने भ्याक्सिन बनाउन विकसित मुलकको प्रतिस्पर्धा चलिरहे पनि अहिलेसम्म कोरोना सङ्क्रमण पुष्टि भइहालेमा रोग प्रतिरोधात्मक क्षमता बढाएर परास्त गर्नुको विकल्प छैन,’ उनले भने, ‘त्यसैले रोगसँग लड्ने क्षमता बढाउने वनस्पति गुर्जोको सेवनकर्ता बढ्न थालेका छन्।

जिल्लामा कोरोना सङ्क्रमण भएर आइसोलेसनमा बसेका, जोखिमयुक्त स्थानबाट आएर क्वारेन्टिनमा रहेका व्यक्तिले मात्रै नभएर अरूले पनि रोग प्रतिरोधात्मक क्षमता बढाइ सङ्क्रमण हुन नदिन गुर्जोको रस र धुलो सेवन गर्ने गरेका छन्।

उनका अनुसार गुर्जो शताब्दीदेखि नै औषधिका रूपमा प्रयोग भए तापनि पछिल्लो समय त्यति प्रयोग हुन्थेन।

औषधीय गुणले भरिपूर्ण वनस्पति गुर्जोको लहरा कोरोना सङ्क्रमण देखिन थालेपछि चर्चामा आएको हो।

© 2021, Sidha Media. सर्वाधिकार सुरक्षित नोट : यस सिधा मिडियाबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘सिधा मिडिया डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

यो खबर पढेर तपाईलाई कस्तो महसुस भयो ?

प्रतिक्रिया दिनुहोस