ल्होसारको अवसरमा माघ २८, २९ र ३० गते सार्वजनिक बिदा

काठमाडौं – तामाङ समुदायको सांस्कृतिक पर्व ल्होसारको अवसरमा ३ दिने सार्वजनिक बिदा हुने भएको छ ।

काभ्रेपलाञ्चोकको नमोबुद्ध नगरपालिकाले ल्होसारको अवसरमा ३ दिन बिदा दिने निर्णय गरेको हो ।

नमोबुद्धको नगर कार्यपालिकाको बैठकले ल्होसार मनाउनका लागि माघ २८, २९ र ३० गते बिदा दिने निर्णय गरेको जनाइएको छ ।

तामाङ समुदायको सांस्कृतिक पर्वलाई ल्होसार भनिन्छ । तामाङ समुदायले ल्होसार पर्वका अवसरमा सामाजिक सद्भाव कायम गरी आफन्तजनसँग खुशीयाली मनाउने गरेका छन् ।

तामाङ भाषामा ‘ल्हो’को अर्थ वर्ष र ‘सार’को अर्थ नयाँ भन्ने हुन्छ । नेपाली पात्रोका अनुसार माघ शुक्ल प्रतिपदाको दिनलाई ल्होसार अर्थात् नयाँ वर्ष मान्ने गरिएको छ ।